Alle barnehagane i Sykkylven har sidan 2015 gått saman om ei stor satsing som vert kalla Solid Start Sykkylven. Dette er eit omfattande fellestiltak der målet er at barna skal utvikle grunnleggande motoriske ferdigheiter som fundament for læring.
Modellen er henta frå Gausdal kommune, som etter oppstarten i 2010 kan vise til svært gode resultat. Ikkje berre helsemessig, men også i form av betre skrive- og leseferdigheiter, færre melde saker til PPT, mindre åtferdsproblem og betring på det psykososiale området. Representantar frå Sykkylven var på studietur til Gausdal både hausten 2015 og våren 2016, og opplegget har i ettertid blitt tilpassa lokale forhold.
Grovmotorisk, finmotorisk og sansemotorisk trening (t.d. augebevegelse) skal gi eit løft for alle barna. Nyare forsking viser at fysisk aktivitet har samanheng med kognitiv utvikling. Barn med gode motoriske ferdigheiter kan ha betre skuleprestasjonar enn barn med nedsett motorikk.
Kommunal fysioterapeut og kommunal ergoterapeut er sterkt delaktige i prosjektet (rettleiing/praktiske øvingar/kartlegging/informasjon til foreldre m.m.). Alle kommunale og private barnehagar i Sykkylven er med. Superbrukarar frå kvar barnehage møtast jamleg til samlingar for å dele erfaringar og motta rettleiing/informasjon. Nye idèar ført attende til eigen barnehage og prøvd ut i praksis. Det har dessutan blitt arrangert felles studiedagar der eksterne fagfolk har bidratt til kompetanseheving, m.a. Sherborneforeningen Norge og Motorikksenteret i Trondheim. To sentrale stikkord for Solid Start Sykkylven ”leik” og ”ikkje-konkurranse”. Det skal vere kjekt og morosamt for barna, og dei skal oppleve at aktivitetane er eit mål i seg sjølv.
Årshjulet styrer kva ein skal fokusere på i perioden og gir forslag til ulike type aktivitetar. Barna merkar ikkje at dette er trening, då det er ein naturleg del av dagleg leik og aktivitet, og vert tilpassa føresetnadane til kvart enkelt barn. Det vert også jobba mot ei innfasing på småskuletrinnet.
